اسلام آباد ۔ 3 جون(اے پی پی) وفاقی وزیر خزانہ سینیٹر محمد اسحاق ڈار جمعہ کوں قومی اسمبلی وچ آوندے مالی سال 2016-17ء دابجٹ پیش کریندے ہوئیں آکھیا جو حکومت صنعتی اصلاحات دے ایجنڈے دے فروغ سانگے خصوصی اقدامات کریندی پئی ہے ۔ انہاں آکھیا جو حکومت حال وچ شروع کیتی گئی یوتھ بزنس لون سکیم وچ تریمتاں سانگے 50 فیصد دا کوٹہ رکھیا ہے تاں جو تریمتاں وی آسان شرائط تے کاروباری سرگرمیاں سانگے قرضے دی سہولت حاصل کرسگن۔ وزیر خزانہ آکھیا جو یوتھ بزنس لون سکیم دے تحت حاصل کیتے گئے قرضہ جات تے شرح سود کوں 8 فیصد توں 6 فیصد تائیں گھٹ کرڈتا گئے۔ انہاں آکھیا جو حکومت وفاقی حکومت دیاں ملازمتاں وچ تریمتا ںسانگے سال 2007 ء توں 10 فیصد کوٹے دااعلان کیتا ہائی جیرھا ایں توں پہلے پنج فیصد ہائی جڈانجو تریمتاںعام نشستاں تے وی اوپن میرٹ دے ذریعے ملازمت حاصل کرسگدیاں ہن ۔ صنعتی اصلاحات ایجنڈے دے تحت قومی اسمبلی وچ تریمتاں سانگے 60 نشستاںمختص ہن۔ سینیٹر محمد اسحاق ڈارآکھیا جو حکومت بے نظیر انکم سپورٹ پروگرام دے ذریعے تریمتاں کوں نقد رقوم فراہم کریندی ہے اتے ایندے حجم وچ ودھارا کر ڈتے گئے جیرھا مالی سال 2013ء وچ ماہانہ ہک ہزار روپے توں ودھا تے 1200 روپے کیتا گیا ہائی اتے ایندے بعد سال 2014ء وچ اینکوں 1500 روپے کرڈتا گیا۔ انہاں آکھیا جو ایجھے ویلھے وفاقی حکومت پروگرام دے تحت 50 لکھ گھرانیاں کوں نقد رقوم دی منتقلی کریندی پئی ہے۔ تریمتاں کوں کم دی جاہ تے ہراساں کرنڑ دے خلاف تحفظ ایکٹ دا حوالہ ڈیندے ہوئیں انہاں آکھیا جو ایہ ایکٹ 2010ء وچ منظور کیتا گیا ہائی جیندے تحت کم دی جاہ تے تریمتاں کوں ہراساں کرنڑ دے خلاف تحفظ سانگے 2013ء وچ وفاقی محتسب داقیام عمل وچ لاتا گیا ۔ انہاںآکھیا جو کارکن تریمتاں دی سہولت سانگے وفاقی حکومت ڈے کیئر خدمات دی رسائی وچ وی چنگائی گھن آمدی پی ہے ۔
.jpg)
